திருக்குறள் அறுசொல் உரை: 112. நலம் புனைந்து உரைத்தல் : வெ. அரங்கராசன்
அகரமுதல 168, மார்கழி 24, 2047 / சனவரி 08, 2017
திருக்குறள் அறுசொல் உரை
03. காமத்துப் பால்
14. களவு இயல்
112.நலம் புனைந்து உரைத்தல்
தலைவியின் நலம்மிகு அழகைத்,
தலைவன் மகிழ்ந்து பாராட்டியது.
(01-10 தலைவன் சொல்லியவை)
- “நல்நீரை வாழி, அனிச்சமே! நின்னினும்,
மெல்நீரள் யாம்வீழ் பவள்”.
“மெல்லிய அனிச்சப்பூவே! என்னவள்
மெல்லியவள், உன்னைக் காட்டிலும்”.
- மலர்காணின் மையாத்தி நெஞ்சே! இவள்கண்,
பலர்காணும் பூஒக்கும் என்று.
“மனமே! இவள்கண், பலர்காணும்
குவளைப் பூப்போல்என, மயங்காதே”.
- முறிமேனி, முத்தம், முறுவல், வெறிநாற்றம்,
வேல்உண்கண், வேய்த்தோள், அவட்கு.
“தளிர்உடல், முத்துப்பல், மலர்மணம்,
மூங்கில்தோள், வேல்கண், அவளுக்கு”.
1114. காணின், குவளை கவிழ்ந்து நிலன்நோக்கும்,
“மாண்இழை கண்ஒவ்வேம்” என்று.
“இவளின் கண்ணைக் காணின்,
‘ஒப்பாகேன்’ எனக், குவளை தலைகவிழும்”.
- அனிச்சப்பூக் கால்களையாள், பெய்தாள்; நுசுப்பிற்கு,
நல்ல படாஅ பறை.
“அனிச்சப்பூவைக் காம்போடு சூடின்,
இவள்இடை தாங்காது; ஒடியும்”.
- மதியும், மடந்தை முகனும் அறியா,
பதியில் கலங்கிய மீன்.
முழுமதியா? முகமா? என்று
அறியாது, விண்மீன்கள் குழம்பும்.
- அறுவாய் நிறைந்த அவிர்மதிக்குப் போல,
மறுஉண்டோ மாதர் முகத்து?
குறைந்து நிறையும் நிலாக்கறை,
தலைவியின் முகத்தில் உண்டோ?
- மாதர் முகம்போல் ஒளிவிட வல்லையேல்,
காதலை வாழி, மதி!
என்காதலியின் முகம்போல் ஒளிர்ந்தால்,
நிலவே! நீயும் என்காதலி.
- மலர்அன்ன கண்ணாள் முகம்ஒத்தி ஆயின்,
பலர்காணத் தோன்றல், மதி!
குவளைக்கண் காதலியின் முகம்ஒத்தால்,
மட்டுமே, நிலவே! தோன்று.
- அனிச்சமும், அன்னத்தின் தூவியும், மாதர்
அடிக்கு நெருஞ்சிப் பழம்.
அன்னப் பறவையின் மெல்இறகும்,
என்னவள் அடிக்கு, நெருஞ்சிமுள்.
பேரா.வெ.அரங்கராசன்
Comments
Post a Comment